Kahi za cha kijiji cha shononeka kwakala na msichana arevuma nguma ya urembo. Athana were manasinda di cho ho hao arya manenda makimala madzi ga gunwa angine manenda makiuzira kuku magule. Musichana mwenye tha were kanazho, uriokala akilini mwakwe were ni kupata elimu ili adze akole familia ya kwao.

Mbali na udzo wosi sikuli were analongoza. Alimu akwakwe mamuhenza kwa bidhii za kwakwe. Kwa kukala maona maono ga kwakwe, maona ni baha mamugwire mkono ili adze akale kielelezo cha asichana anziye mbereni. Alimu makiamua kumusaidhia na kumurihira pesa za sikuli na masimuinge. Chadi wagwira nguo zikiuma na kubigilika kuhakikisha anahenda kila kitu ili afanikiwe.

Mudzini kwao were kakuna cha kukuhulira isihokala kishomo cha kwakwe. Kahi na vizho zhosini kafire moyo wakala akiangiza moyo nduguze kukala makuluhire mashomo na Mulungu kwani ndizho vindizho akola hakeye. Nduguze mamuthuiriza nyayoze na kumsikiza. Mamiyao naye wakala akiapa malagizo na kuakanya tototo.

Mutihani wa chanane uriohendwa Chadi walongoza anafunzi osi na wakira tototo. Mameye wakala na furaha na wasiwasi akiaza nihani andiye endereza kumfundisha Chadi ko dzulu. Chadi na mameye mabigilika kuno na kurya hadhi makifanikiwa kupata misaadha ya mashirika kuko kisumu achenda sikuli.

Wakathi wa likizo were akidziunga na vikundu zha umri wa kwakwe akidzifundisha jinsi ya kuishi here msichana wa kiheshima. Wadzifundisha ngira nyinji za kukabiliana na maisha. Avulana nao were wanamhenza na kumng’ang’ania kwa udzowe na heshima za kwakwe mbidzo. Chadi pia were ni mcha Mulungu, were kanisani kakosekana na were anabidhii za kumanya neno ra Mulungu.

Bai, siku mwenga mambo gakianza kwenda kombo, shirika ambaro were rinamsaidhia kimashomo Chadi rikifilisika na rikianza kurichiza misaadha kwa baadhi ya ahoho. Chadi wakala mumwenga wa aryahu mariorichwa ni riro shirika. Jambo riri ramubanda moyo chadi na mameye maana maono marigokala nago nihere ganangamika.

Jambo riro ramhenda Chadi kuthafutha vibarua ili adziikire na pia kumsaidhia mameye na nduguze maana maisha were ganzaanza kukala makomu. Be vibarua were ni mjengo, kurima vipande, kuguza mboga. Atu makianza kumsholera mana were anaaza kuchakaa na kukala mchafu,udzo were unammbola porepore kwa sababu ya miishire .Atu maanza kumsholera kwani were adzagaluka.Chadi wanyamala na akithuwa shuhulize khagangizire moyoni maneno gao lakini Kila siku were anahenda masumuriro na malunguwe.”Mulungu uwe ndiwe unamanya Kila kitu nikiriracho.Nakuvoya unipe nguvu za kuvumirira maneno ga atu na siku mwenga uashangaze,”Voyo riro rakala voyore ra  Kila siku .Arihoona vibaruwa arizhokala kuhenda nihere vinamulumiza waamua kwenda Mombasa kuthafutha kazi za nyumbani.Wabahathika kupata kazi Kwa mwanamuche thajiri sana.

         Kwa kukala were ni msichana mwenye malengo ,wahumira nafasi ii tototo.Wakala anaafundisha ahoho a ye muajiri wakwakwe.Pia kahiza yo nyumba were muna vithabu zha Kila aina.Kila ariho marigiza kazize were anashoma vizho vithabu na vingine were vinampa matumaini.

Vihendo zha kwakwe zhamuhenda thajiriwe amuhenze sana.Siku mwenga wahenda masumuriro na Chadi  ili amanye kuhusu kishomo Cha kwakwe.Chadi wamuelezera Kila kitu kuhusu elimu ya kwakwe na akimwambira anahenza kuenderera na mashomo akipata nafasi ama mutu wa kumurihira pesa za sikuli.

       Thajiriwe ariyeifwa Wema watikwa ni moyo madzi.Wathayarisha Kila kitu na akiamua kumuja sikuli.Chandi khaaminire,waona here kwamba andosoni analoha.Wauya kwao achenda achenda mwambira mameye na kudzithayarisha ili auye sikuli.Watsaguzwa kala angehenza kuuya yo sikuli arekala anashoma ama were anamala kwenda nyingine.Waamba aujwe arikokala anashoma.Matumaini masha gakimungira kaheri usha na akiona lengo ra kwakwe ra kukala dakitari wa kwanza muche kijijini kwao lazima rithimie.

Alimu na anafunzi a sikuli ya Juhudi mamuhokera Chadi kwa mikono miri kwa kukala were ni mutu wa atu.Kila mutu were ana hamu naye.Chadi naye wazidhi kuhenda Chadi here dza ro dzinare.Wavuma kwa sifa za kwakwe kahiza michezo, mashomo na hatha kudzimbozeza kahiza mikutano ya mafundisho ga anamarika.Kila wakathi wa likizo wahakikisha anenda mafundishoni gakale ga vithabuni ama ga anarika.

Chadi washangaza anji mtihani wa mwisho urihofika.Kila mutu were anamanya andakira lakini SI kukala akale wa kwanza ntsi yosi.Majibu gariho mbola ,ndiye arelongoza Kila mutu.Vituo zha redio nazho vikikala vinamumala Kila hatu.Anahabari nafika kijijini kwao kulikokala tha khakukira magari.Kwa mara ya kwanzasuraye na dzinare raonekana Kila hatu.Atu mashangaa arizhokira mtihani kwani wakalanje ya sikuli miaka mihahu mizima.

Chadi khadzivunire hathakala dzinare rakala rinamanyikana Kila hatu.Waifiwa kwenda shomera udakitari kaiza chuo kibomu cha Nairobi.Afadhili kumbola Kila pande madzimbozera ili mamufadhili.Mameye Chadi wafahirwa kwani wamuhenda aheshimiwe ni atu anji.Kila mutu wakala achenda kwakwe ili kuuzira usharudi.Arichoambira ni kukala waakabidhi anae kwa Mulungu Were si Chadi Hawkeye lakini tha oangine were manalongoza ko sikuli

Kuko chuoni Chadi wakala na changamoto nyinzi lakini khabakure vizho wauza uza akipewa marifa gakumhendaakabiliane na changamoto zizo.Kwa kukala were ni mutu wa atu ,wahenda asena anji mariokala manamungiza moyo kala anakirira mautu makomu.Rafiki ariye khandamsahau kwenye chuo kicho ni Mwanaheri.Mwanaheri were anambila kahiza familia thajiri sana.Arihohenda usena na Chadi makala na kipindi maalum cha kuzungumza kuhusu maisha ga badae.Makala makinenda hamwenga na ukimona Chadi bila shaka Mwanaheri andakala haho.Kwakukala Mwanaheri kwao were ni hehi kuko Nairobi,makala machenda hamwenga na Chadi kwao.

Familia ya Mwanaheri yamuhalira Chadi here mwana wao.Makala manamugulira nguo hamwenga na mwana wao.Chadi wapata familia mbisha na akikala anaambira Kila kitu kirichokala kina mpa shida. Waona ni vidzo pia akiambira kuhusu familia ya kwakwe.

Familia zizo mbiri zaunganishwa ni ao asichana airi.Makikala here familia mwenga idzahokala kamamanyana Kimbari.Mwanaheri akikala anenda hamwenga na Chadi kuko kwao Pwani kumbola Nairobi wakathi wa likizo.Mameye Chadi naye wamuhalira Mwanaheri here mwana we Wamukaribisha Tototo na wafahirwa ni wo usena wao.Chadi wamulauza Mwanaheri Kila Kila hatu arihohamanya kuko kwao.Akimwanyesa matunda ga tsakani here maungo,virori na vipo.Wamwanyesa jinsi ya kurya makanju na kuocha korosho.Wafundishwa khugita na mafiga na Hatha kubanda Kuni.Mwanaheri kahendere nzagu kwa kukala wahalira kuko pia ni kwao.Khakalire here dza atu angine a Nairobi kubagua chochosi.Hariho mtsunga warya ama migazija ya kuocha warya bila dzagu Zhoarizhoona Chadi anarya naye warya kwani wamanya iyo ndo ngira mwenga ya kunyesha mahenzo.Idzahokala were khadzazowera wafahirwa ni maisha ga kwa ni Chadi.Waona atu kuko mana umwenga.Ani Chadi were manarya hamwenga na kusumurira hamwenga.Tofauti na ko kwao ,atu a kuko Pwani manalamusana makionana ngirani si here kuko kwao.

Chadi waamua siku mwenga mende hamwenga na Mwanaheri sikuli ariyoshomera.Lengo rao bomu were ni kwenda Nena na anafunzi a Madamani kuko kijijini kwao.Chadi furahaye bomu nikuona atu manabadhilika na kuthamini elimu.Baada ya kunena na anafunzi AO anji maonekana kuvuhirwa ni asichana ao airi.Angine maahidi kuhenda bidhii ili madze makale madakitari.Ahoho anji mabadhiliko na pia majibu gao ga mitihani ga badhilika.Kunena na anafunzi ao kwa badhilisha mitazamo yao na makianza kukala na malengo.

Pia makala machenda sikuli tofauti ili kuangiza moyo anafunzi mariokala kamana matumaini kahiza mashomo gao.Kukirana na bidhii za kwao anafunzi anji mabadhilisha mitazamo ya kwao.Ahoho maanza kuika malengo kwani anji were khamana malengo.Chadi na Mwanaheri were manafahirwa kuelimishwa anafunzi anji.Sikuli nyinji zaanza kuamala.Nguma yaenea kosi kukala Kuna asichana maelimishao anafunzi.Mwanaheri wafahizwa ni Ii kazi tha were khathamani kuuya Nairobi.Were khadzangwe kunena na kuelimisha anafunzi.Were azowera kukala nyumbani siku zosi.Likizo irihogoma mauya sikuli na makianza makundi ga kuelimisha angine ko sikuli.Maelimisha anziyao mariokala manahumira mihadarati .Kikundi cha kwao chaelimisha anji na makikala hadha manenda maeneo mangine kuelimisha anamarika na safari Ii were ni anji.Kikundi cha kwao chamanyikana kunji na makipata misaada kumbola kwa mashirika ili madime kuendereza shuhuli za kulongoza anziyao.Hatua Ii yazidhi kuangiza moyo atu anji haswa alimu a Chadi kuko mudzini marihosikira habari zizo.Cho Kikundi chao chavuma dzina kunji na atu were mathayari kuiga mfano wa kwao.Chadi khasauire kithabu.Wakala anapanga wakathiwe tototo.Usiku usiku were anakeresira kithabu na kushoma.Pia wakala anahenda utafiti kuhusu to kazi ariyokala anashomera.Wauza mawaidha kwa madakitari tofauti tofauti.Dakitari Busara were ndiye adzemukuluhira kwa manji kuhusu udakitari.Dakitari Busara wadzimbozera kumuelekeza na kumulongoza msichana yuyu ariyekala ni tofauti na angine kwa jinsi arizho dzihuma.Chadi were akamtsemberera Dakitari Busara ko sipitalini kwake.Were anagwaga akili na kulolera Kila kitu atengezeracho akongoe.Mara nyingine wakala anamuviza ho arekala anadima.

(Stay tuned, to be continued)